مش لازم اى انجاز تعمله بلدك كلها تعرف و جيرانك اللى فوق و اللى تحت و قرايبك اللى قريبين و اللى بعاد عنك يعرفوا.
مش لازم لما تعطس او تكح او تشنق تكتب statue ع الفيس انك تشعر بالمرض، اوعى تكون فاكر انهم هيجوا يمسحولك مناخيرك و لا يجيبولك الدوا...! لا انت بتحلم .
مش لازم علشان انت قررت انك تروح الجيم يبقى تنزل او تنزلى صورة بقى سيلفى و تكتب In the Gym اوعى تكون فاكر ان ده تنويه للكراش انه يقابلك هناك .
مش لازم علشان انت تحس بوجودك ،بنفسك فى الحياة انك كل شوية تنزل Statue ايه اجمل صفة فيك/ ايه عيوبك و مميزاتك و مش هزعل لانى انا عارفة ذى ما غيرى عارف انك عايز تسمع المميزات مش العيوب و عبارة ( مش هزعل ) ديه شكليات علشان تقلل اى فكر جيه ع دماغ الناس انك شخص مش واثق من نفسه .
خلاصة الموضوع:
حلو انك تعمل رياضة ، بس مش حلو انك كل شوية تعمل زيطة .
حلو انك تطمن اللى بيحبوك ع نفسك ممكن فى رسالة او مكالمة لكن مش حلو انك بتكتب حالتك ايه علشان تحصل ع الاهتمام من الناس و تفضل فى كل بوست شخصى كأنك رافع ايدك فوق و تقولهم انا هنااااااااا اهتموا بيا بقى.
حلو انك تشارك مع الاخرين فرحتك بحاجة جت بعد تعب حاجة انت نفسك ماكنتش متخيل انها ممكن تحصلك .
حلو انك تعرف عيوبك ايه و مميزاتك ايه لكن مش حلو انك بدل ما تعدل عيوبك بتفضل كل مرة تسال الناس عن مميزاتك علشان تشبع من جواك احساس اساسه خاطئ( انا الناس مش معبرانى علشان جوايا عيوب) و لما تلائى كل الناس بتقول مميزاتك بيجيلك سؤال تانى اصعب و برده خاطئ( طب هو مادام كله واخد باله منى ليه مش معبرنى؟!)
فما تزعلوش بقى وتقولوا الناس بقت تدخل فى خصوصيات الاخرين ما انتوا ببساطة اللى فتحتوا باب شقتكوا للغرب مهما كانوا و قولتلهم اتفضلوا اسرقوا بيتى و حياتى !.
ده مش نقد و لا رخامة ده ببساطة نقل وجهات نظر الاخرين الغير منطوقة ليك ....
