التعليق الاول ع مسلسلات رمضان 2017

انتوا مش ملاحظين حاجة غريبة
حورية فرغلي كانت عاملة مسلسل ساحرة الجنوب و كان حلو جدا بشهادة الجمهور 
 رمضان السنادى يوسف الشريف عمل مسلسل كفر دلهاب قائم ع نفس فكرة مسلسل ساحرة الجنوب اللى هو السحر
رمضان اللى فات يوسف الشريف عمل مسلسل لعبة ابليس و كان فى لقطات كتيير أنه ساحر
 جيه رمضان ده عمرو يوسف عمل مسلسل قريب من المسلسل ده و اسمه عشم ابليس و برده فيه لقطات عن كونه ساحر 
 حورية فرغلى سابت موضوع السحر ليوسف الشريف فى رمضان ده و عملت مسلسل تانى خالص واخد شوية من مسلسل لعبة ابليس أنها طالعة سيدة أعمال
في ايه يا جماعة هم الممثلين بيسلموا ع بعض
و بيتبدلوا افكار بعض و الا ايه
 ع العموم احنا لسة فى أول الحلقات هنقرر فى الاخر برده
كل عام و انتم طيبين 
رمضان كريم

عيد ميلادى- خبرات حياتى

عيد ميلادى النهاردة .....سنة جديدة عدت من حياتى ....عمر تانى عدى عليا
سنة كانت بمثابة سنين
شوفت فيها صعاب ياما ....اتجرحت من ناس و اتأذيت من ناس
بس اتعلمت فيها حاجات ان ممكن الغدر يجى من اللى هو سندك و ظهرك
يجى من اقرب الناس ليك عادى خالص
اتعلمت انك ما تأمنش لحد صديق جديد لازم تحط فيه نسبة شك انه يبيعك و نسبة شك انه يكون واخدك مصلحة
اتعلمت ان الاكل و الشرب  ده اخر حاجة تفكر فيهم فى حاجات كتييير اهم من انك تفكر هتملى معدتك بايه النهاردة
اتعلمت ان مصطلح بالتدريج و واحدة واحدة و ان اول خطوة هتيجى بعدها بالتدريج التانية ده مصطلح غلط
الحقيقى ان فى طريق شاق طوييييل لازم تمشى فيه علشان تقابل الخطوة الاولى و بعديها طرييق شاق طويييل علشان تقابل الخطوة التانية.
اتعلمت ان لكل مجال له مراره الخاص.
و اللى اكتشفته ان مهما مريت من تجارب و خبرات شخصية لن يتبقى لك سوى ان تمر بخبرات حياتية اللى بتيجى من الشغل علشان تعرف تعامل مع البشر..
الخلاصة : الحياة تجارب صعبة ..طول ما انت ماشى مع ربنا فى حياتك ربنا مايسبش حد ماشى فى الطريق الصح وياخد ع قفاه ابدا.