المعافرة

كتير بسال نفسى مين اللى بيحدد الفقر و الغنى؟!!

بمشى فى الشارع ، ببص ع الناس و بسال يا ترى ده اتولد غنى كدة و ده اتولد فقير كدة و الاتنين المفروض يكمل حياتهما ذى ما هى بغناها او فقرها؟!!

بدأت ابص ع الناس اللى فى سنى ده اتولد و ابوه شايله فى البنك شئ و شويات 

و ديه اتولدت  و اهلها شايلين ليها و مجهزنها و هى لسة فى بطن امها 

طب و الناس اللى اقل منهم ليه مش ذيهم ؟! 

ليه هم مختلفين عنهم ؟ مع ان غنى الناس دول مش غناهم ده الاب اللى كافح و الام شالت معاه 

و فى الاخر عيالهم اتوالدوا و فى بوقهم معلقة دهب.

اللى شدنى اكتر فى الموضوع و لسخرية القدر ان الناس اللى اقل منهم فى المستوى لو عملوا حاجة واحدة غريبة ممكن تكون حاجة هبلة ، افتكاسة ذى ما بنقول ياااه ع كم الكلام اللى بيتقالهم من اللى اعلى منهم .

الاول يقولولهم كلام جارح يهز من ثقتهم فى نفسيهم و بعدين يحسدوهم عليه ههههههه ع رأى  المثل المصرى: الكحكة فى ايد الفقير عجبة .

الاغرب ان فى مجتمعات بتحدد الارتباط بمعايير غريبة 

و القيم و المبادئ الجميلة مجرد كلام تصبيرة

تعالوا ناخد مثال بسيط: فى مجتمعات مثلا تحدد ان الارتباط مثلا للبنات ان البنت لازم تبقى معاها فلوس ( مش قصدى فاحشة الثراء) و تبقى جميلة و رفيعة علشان ترتبط بسرعة لكن لو واحدة عادية و مش معاها فلوس يبقى خليها اعدة

ذى الولد بالضبط لازم يكون شغال فى حتة حلوة بمرتب متين و ياسلام بقى لو باباه و مامته جايبنله الشقة و معاه فلوس للشبكة اللى فى نظر معظم اهالى العرائس تكون معدية ال 10 الالاف جنيه .

طب لمؤاخذة بالنسبة للعقل ، للخلاق ، للذكاء ... ايه موقعهم من الاعراب؟

ردود بعض الناس اللى رصدها فى الموضوع ده ان دول مهمين ( العقل، الاخلاق، الذكاء)، لكن الجمال و المال و الفلوس هم المدخل للحاجات التانية 

يعنى بالبلدى دور ع الجمال و المال و الفلوس الاول و بعدين شوف هل العقل و الاخلاق و الذكاء موجودين و الا لا؟

لو لا يبقى يتم اعادة البحث مرة اخرى .

ايه بقى لزمتها الرغى ده كله 

فى 3 حاجات توصلتها واجب التوضيح فيها :

1- عااااافر فى الحياة سواء كنت ولد او بنت عااافر ...المعافرة عايزة عضم ناشف مش موجود عند الولاد بس لا عند البنات كمان 

عاااافر فى حياتك يمين و شمال مش لازم فى مجالك ، طلع الموهبة اللى جواك.

2- انت اللى كسبان و الدنيا سهلة عليك مش صعبة ذى ما انت فاكر اللى تولد فى ظروف صعبة ، الشدة بتخلق الجدعان و انت واخد عليها لكن اللى فى بوقه معلقة دهب حياته هتكون صعبة جدا لما المعلقة تضيع منه

3- اعرف ان اى حد بيتقنعر عليك و من اعدتك معاه معندهوش و لا عقل و لا كاء و يالتالى لا اخلاق هو مجرد كوز ذرة متغلف باهله و اللى هم تعبوا فيه مش و او هى و من غيرهم هيتعرى 

فما تحطش فى دماغك حد منهم و لو حد حطك هو فى دماغه مش هيقدر عليك.

اختلافك سر تميزك خليك مختلف لانك و لو لمرة حاولت تبقى ذييهم ربنا هيبعتلك اللى يقولك انت حاجة و هم حاجة .

خليك كدة انت صح وبس عااااافر....